klitsgras jannie

Papawers

jah79 — Sat, 04 Apr 2009 07:39:03 +0000

Hoe lus kry ek nie nou vir ‘n stukkie oerang-oetang marmelade op roggebrood met oorryp piesangs nie. My aarde ek het dit skoon jarre laas geëet.

Rum Pokkel Poker

jah79 — Wed, 10 Dec 2008 16:58:05 +0000

Ek is weer terug na ‘n skrywersblok verlof wat die beste deel van drie maande geduur het. Of die blok voortgebring is deur my skielike verbetering met poker wat ‘n heel nuwe dimensie aan die spel gegee het en as ‘n gevolg al my vrye tyd opgeneem het, en of dit maar net ‘n gunstige toeval was wat my wonderlik besig gehou het tot die blok soos mis voor die kruier nie verdwyn het nie. Want hierdie blok is nog nie weg nie. Dit is eintlik nog erger as wat dit voorheen was. Miskien bereik mens ‘n punt in strategiese poker denkswyse wat jou taalkundige vermoëns op die agterste sitplek plaas terwyl jou primêre fokus bestaan uit straights, flushes, bluffs en diesmeer. So tot die gode my weer seën met my literêre genie gaan ek my aandag maar spits op ‘n tipe van resensie/wat-sê-die-koerante/blah-blah kolom.

Hou jy van jou swaar musiek met ‘n intelligente skop vol jazz, progressive rock, acoustic guitar en Skandinawiese volksmusiek? Dan sê Klitsgras Jannie vir jou: Luister na die epiese Sweedse groep Opeth se nuwe album Watershed. Hierdie is nie ligte agtergrond of partytjie musiek nie. Hierdie is intense sielsvervullende, tydlose passie en oneindige emosie wat wissel van poëtiese prag tot puisgevoosde plofkatarsis. Dit is alleen-luister musiek wat elke oomblik van jou aandag verg, en met nommers wat gemiddeld 10 minute klok is dit ook geen kwiek-fieks nie. Progressive Death Metal is die naam van die genre, maar om vir Opeth in ‘n genre te probeer plaas is moeliker as om Zet in ‘n oond te probeer kry. Luister dit een keer, twee keer en nog ‘n keer. As dit nie die fondamente van jou lewe in 2008 skud nie dan is jy (a) in ‘n gevorderde stadium van rigor mortis; (b) nogsteeds vasgehak aan Sersant Sakkie se Sokjol Treffers 12; of (c) ‘n oerpampoen mampoerman. Hierdie album kry ‘n definitiewe 10/10 en ek sal my beste das stukkend knip en opvreet as daar ‘n beter poging hierdie jaar verskyn.

WWag dat die l..gte aan>gaan…

jah79 — Sat, 12 Apr 2008 11:57:50 +0000

Ongelooflike gebeure in die nuus die hele wêreld oor die afgelop ruk. 2008 beloof om een van die gebeurvolstes nog te wees. Eerstens gaan die dollar drolle kak – Amerika is al so fokkin diep in ‘n resessie in ek kan nie glo die Fed en die Wit Muis Huis ontken dit nie! die credit crunch gan die publiek verminder tot ‘n spul primitiewes wie se grootste tydverdryf gaan wees om rond te skarrel en hulle kosvoorraad te probeer verseker en hulle wonings veilig hou teen ander wat weer hulle kosvoorraad probeer verseker. Niemand gaan meer werk toe nie want daar gan nie meer werk wees nie, nie minstens omdat olie finaaal uitgeput sal wees as gevolg van die hordes dirty bombs wat op die planeet se laaste oliebronne laat val is nie (wie sou nou kon dink dat die terroriste organisasie daaragter die Oos-Transvaalse Skyfskiet en Jukskei Klub was). Papiergeld is waardeloos, industriële produksie het heeltemal gestaak, Jurie Els begin ‘n kinderkerk cult in die Magaliesberge, arm mense word gebruik om biltong mee te maak, die Universiteit van Stellenbosch word ‘n polisie kollege – anargie is aan die norm van die dag. Dit. Gaan. Rock!

Ek het laas week haelgeweer mounts op my motor aangebring. Volgende naweek gaan ek hom koeëlvas maak en kettingsaag lemme op die bumbers sit. Hierdie opgraderings vir die Nuwe Wêreld Orde kom nie goedkoop nie, maar dis te danke aan die goudprys wat so wisselvallig maar pragtig al hoe meer Noord-Oos dans. En sy gaan nog baie lank so mooi dans. Koop, voor dit te laat is. My oorle tant Serpneus se boedeltjie juwele kom nou erg handig in. Maar al hierdie wonderliek modifikasies is nie om my teen ander mense te beskerm nie, o nee, hierdie is vir die zombie apocalypse wat nie te vêr om die draai is nie, ook beken as die wederkoms. Die mense wat glo in die tipe van ding het my ingelig dat al die tekens daar is, of te wel daai ou in Oxford Circus wat dit heel jaar lank hardop uitbasuin. Apparently moet dit nog net renoster-grootte paddas reën wat poedel-grootte springkane ejakuleer wat weer op hulle beurt suurreën kots. En dan gaan daar een of ander lang-haar hippy wat so 2000 jaar terug gelewe het afvlieg uit die ruimte uit met ‘n jetpack en dooie mense uit die graf gaan laat opstaan met inter-planetêre spirituële mojo geskenk deur John Travolta en kie. As hierdie ondood die strate begin loop moet ‘n mens reg wees. Ek kan nie meer fokkin wag nie!

“A nation that continues year after year to spend more money on military defense than on programs of social uplift is approaching spiritual doom” – Martin Luther King Jr, April 4 1967.

Bogenoemde het verskyn in die April 2008 uitgawe van Die Stem, ‘n maandelikse koerant wat gratis versprei word in London.

Torings van klei

jah79 — Sat, 12 Apr 2008 11:52:59 +0000

Warboel die Teefeetjie
Die tafel is gedek.
Reghoek.
Een by elke kant.
Vetkoek.
Vier pare oë rek.
Prenteboek.
Geweer in die bek…

Die algemene verkiesings in die VSA is ‘n interessante affêre. Nie minstens omdat dit die skeinheiligste skouspel van “demokrasie” is sedert Pontius Pilatus ‘n worsbroodjie stalletjie in Bethlehem oopgemaak het nie. Dit gaan interessant wees om te sien of Barack Obama actually vir Billary Clinton klop om die Democrats se kandidaat te wees, gegewe dat politiek in die VSA deurtrek is met bloedlyne en dat gevestigde familie name meer beteken as ‘n doos vol sywurms wat beet gevreet het. Selfs Obama is ‘n 8e neef van Dick Cheney en ‘n 11e van George “Maak soos Rokof” Bush! Maar die uitverkorenes beland ook slegs in mag as hulle die lobbyists tevrede hou en in die proses word hulle eie sakke vol dollars gepomp. Obama is vol sprake van “verandering” en die wêreld ‘n beter plek maak, maar hy noem ook nooit presies wat hierdie verandering behels nie. Aan die ander kant is ek seker dat wie ook al vroeg volgende jaar in die Wit Huis beland by default die wêreld ‘n beter plek sal maak, na al die kak wat die swaap wat tans daar woon aangevang het. Maar gee my Obama bo Bill se babe enige dag van die week.

Dan die Republicans. Daar is een kandidaat wat ‘n vars bries oor die stank van Amerikaanse politiek kan blaas. Maar sy idees is te radikaal vir die hoofstroom media wat in die geldsakke van die bankierskorporasies rond swem en met hulle sinistêre agendas moet daar tog net nie ingemeng word nie, netnou verloor hulle ‘n fraksie van hulle bloedbevlekte rykdom en mag. Dan raak hulle bang en dan raak hulle boos en en dan draai hulle die skroewe van die globale ekonomie al stywer tot die behuisingsmark inmekaar val en ons ‘n depressie betree as gevolg van die verstommende hoeveelheid krediet in sirkulasie. In elk geval, die media “blackout” (of noem mens dit deesdae ‘n media “load-shed”?) rondom hierdie kandidaat was so ooglopend dat dit absoluut belaglik geraak het. Selfs sogenaamde left-wing koerante soos die Guardian het in lyn geval. Maar die internet is besig om die politieke landskap te verander en (hopelik) stadig maar seker ontslae te raak van mense se naiwiteit wanneer dit by politiek kom. Soos wat geskryf staan op die tuisgemaakte plakkate wat Amerikaners langs besige paaie rondswaai: Google Ron Paul.

Om Te Is

In die jukstaposisie van ons skaars bedekte bewussyn en die dreunende grom van institusies sonder vervaldatums. Diep weggesluit in eeu-oue struwelinge, dog net onder die oppervlak van die nuutste generasie om tou in te gooi en in lyn te gaan staan. Marseer die massas nie op dromme van vurige emosie nie, maar wandel doelloos in donker gange gevul met die oorverdowende stilte van die siel.

Bogenoemde het verskyn in die Maart 2008 uitgawe van Die Stem, ‘n maandelikse koerant wat gratis versprei word in London.

Net skape het ‘n skaapwagter nodig

jah79 — Sat, 12 Apr 2008 11:36:23 +0000

Interessante gebeure wat onlangs in Suid-Afrika afgespeel het oor die feit dat iemand iets oor Satanisme gese het in een van die kakste koerante ooit, die Rapport. Die van julle wat nie die storie gevolg het nie, daar was ‘n massa-opsweep deur die verkrampste donker gate van histeriese Afrikaner konserwatiewe onnoselheid waar byna al die koerant se ongeveer 666 lesers hulle stemme, wat eerder stilgemaak moet word, dik gemaak en beloof om die koerant te boikot. Maar hierdie verskynsel is niks nuuts nie, want dié tipe gedrag kom gereeld voor in ‘n mede inboorling van ons wonderlike planeet: die getroue skaap. Wanneer hierdie “trop” sekere buzz-words of simbole teë-kom dan flits daar net ligte en basuin alarms in hulle koppe dat alle rasionele denke vinniger by die ruit uit donder as wat mens kan sê “welkom in die nuwe donker eeue”. Aangesien die gesamentlike IK van ‘n trop skape ook minder is as dié van ‘n AWB-lid is daar net een manier waarmee met hierdie tipe mens gekommunikeer kan word: “mê-mê-mê!”. Sies man, dis julle wat Afrikaanse mense ‘n slegte naam gee!

Olie is dikker as bloed

…en daar was lig. Die mens het geleer oor sy omgewing en die diere en plante wat saam met hom in die lukrake katarsis van tyd en ruimte gegooi is. Soos ‘n tonteldoos sonder ‘n kers, soos ‘n rewolwer sonder ‘n sneller, het die mens probeer sin maak van alles. Natuurlik was die maklikste manier om die mees kleurrykste stories en fabels uit te dink. “Daar moet ‘n rede wees omdat ek hier is”, het die mens ewe egosentries en narsissisties gepeins. “Daar moet iets groter wees as dit wat ons kan sien” het die mens filosofeer in sy primitiewe brein, al te gretig om ontslae te raak van verantwoordelikheid vir sy aksies en ‘n verklaring vir sy bleek lewensuitsig te ontgin sodat vals hoop kan wortel vat. Die mens se kultuur en tegnologie het eksponensieël vermenigvuldig, maar daar was verskeie groepe mense, en almal het teen hulle eie tempos ontwikkel. Sommige groepe het begin dink hulle is beter as ander en ‘n self-vernietigende trots het ontstaan. Die leiers van hierdie groepe het besef hulle dae is getel, en het gebruik gemaak van terreur om hulle bevolkings onderdanig en getrou te hou wyl die leiers se ongeoorloofde militêre inkursies al wyer en wyer gestrek het, tot hulle uiteindelik hul eie menslike en natuurlike hulpbronne begin uitput het. En dit was donker.

Bogenoemde het verskyn in die Januarie 2008 uitgawe van Die Stem, ‘n maandelikse koerant wat gratis versprei word in London.

‘n Knippie sout gaan ‘n lang pad

jah79 — Sat, 12 Apr 2008 11:27:01 +0000

‘n Nokturne ope-lug projeksie van Sewende Laan se Kersfees bonanza het spektakulêr misluk nadat organiseerders per abuis ‘n dokumentêr oor die ontstaan van die heelal in plaas daarvan vertoon het. Dit het gelei tot 28 lewens wat verloor is, en hordes meer ernstig beseer. “Ek dog dis tyd vir die Here om te kom en almal in zombies te verander” is wat deur een van die gelukkiges wat die bloedbad vrygespring het se gedagtes gegaan het. En dit was als te danke aan haar impulsiewe soet-tand. “Ek was so lus vir ‘n stukkie melktert, toe mik ek my loopraam in Tant Tossie se tert winkel se rigting. Ek was daar in en uit vinniger as wat jy kan sê “kattebak”, en het net by die winkel uitgestap toe hoor ek ‘n gekners van tande in die rigting van die vertoning.”

Sielkundiges en sosioloë sê hulle waarsku die owerhede al lank teen ‘n voorval soos hierdie. “‘n Oorgrootte meerderheid mense wat Afrikaanse sepies volg is geneig om altyd ‘n berg van ‘n molshoop te maak, die kat agter die bult te gaan haal as jy wil,” sê Dr Dreyer van die Kliniese Instituut vir Kliniese Institue op Kakamas. Dr Hans Wors van die Nasionale Raad Vir redeneer dis meer ‘n geval van “gee die mense wat hulle wil hê dan sal dit almal se lewens makliker maak, niemand hou van ‘n hond in die pot nie”. Kaptein Vonk van die weermag het bevestig dat tot daar meer helderheid oor hierdie tragedie is asook hoe om ‘n soortgelyke insident te voorkom, is alle asemrowende inter-planetêre skouspelle in ‘n 5-ligjaar radius vir eers gekanseller. Verskoon asseblief die ongerief.

Fokbeskuit

Swaziland is in die middel van ‘n hongersnood en ontvang noodvoedselhulp terwyl die regering bio-brandstof uitvoer wat vervaardig word uit een van hulle belangrikste stapelgewasse. Die koning van Saudi Arabia besoek Engeland en die regering trompetter die kosbaarheid van die waardes en ideale wat die twee lande deel. So, gaan hulle binnekort homoseksuele mense, losbandiges, heidenne en enige iemand wat nie in lyn met die staat dink nie in Trafalgar Square onthoof? Die twee dwelms wat nie net die meeste aantal lewens van enige dwelm per jaar eis nie, maar derduisende meer in die hospitaal sit, verhoudings, families en meer vernietig is wettig die hele wêreld oor en word deur regerings belas om hulle koffers vol dollars, ponde en rande te laai en belaglike bedrae geld op bomme, wapens en onwettige oorloë spandeer word waarmee onskuldige mense vermink en doodgemaak word, eerder as om hulle eie land se mense, ons, op te voed en gesond te hou. En dan erken sommige mense nog met trots oor ‘n glas wyn en sigaret in die hand “ek vat nie dwelms nie”. O, die soete ironie. Ons wêreld is meer deurmekaar as ‘n trapsuutjie op ‘n Smarties doos. Kom ons almal steek bietjie ons koppe in die byneste van die status quo in.

Herhaal agter my: “Ons het geen vrye wil nie, die illusie is net so sterk ons dink ons het”.

Bogenoemde het verskyn in die Desember 2007 uitgawe van Die Stem, ‘n maandelikse koerant wat gratis versprei word in London.

Die somer wat nooit was nie

jah79 — Sat, 12 Apr 2008 10:14:58 +0000

‘n Paar dae terug het ‘n aangenaam-besope boemelaar, terwyl hy besig was om katjiebotter met sy hande uit die vles te eet en sy vingers af te lek asof dit ‘n resies was, my dringend in die oë gekyk en helder soos dag in ‘n hoogs-opgevoede stem gesê: “mmmfllrrrr bllrrf pfrrtlr nrrrt!!” Op daai oomblik het ek gedink hy praat absolute kak, maar hoe meer ek daaroor gepeins het in die dae na dit, hoe meer het ek besef hy het iets beet. Iets verskriklik groot. ‘n Openbaring van magtige proporsies, wat heel moontlik die fondamente van ons kontemporêre samelewing en ons begrip van ons spesie en alles om ons – die wêreld, die heelal – tot in sy mees gevestigde waarhede kan skud, ruk en donder dat al wat aan die ander kant sal oorbly ‘n pap lel van realitiet in ‘n leë dop van rasionaliteit is. Ek skrik toe my malle moer af en sit maar die aaptwakkie vir eers neer.

Herfs hier bo, lente daar onder.
Rugby, globale verhitting en die oorlog in Irak.
Droogtes, oorstromings, drop-kicks en dagga.
Bruin blare in die straat en spatare op die hoofde van staat.

Politicians. Idiote. Jirre maar hulle kan my omkrap. Tog op ‘n manier is ek verslaaf daaraan om op hoogte te bly met internasionale politiek. Die woede wat dit in my veroorsaak is ‘n dryfkrag in my lewe. As mens leer om aggressie konstruktief te gebruik is dit ‘n wonderlike ding. Geagte Mnr George Bush en alle ander fassistiese, rassistiese, right-wing nazis en close-minded mense op hierdie planeet van ons – fok u!

Meer as 12 biljoen jaar se evolusie van die heelal, 4.6 biljoen jaar van die aarde en ‘n paar miljoen jaar van ons spesie en kyk na ons sogenaamde “leiers”. Wat teen oorweldige populêre opinie besluite maak en massa-optogte ignoreer soos ‘n stuk snot teen die muur. Ek wonder soms of daar geen ander opsie as anargie is nie. En dit pis my ook af hoe die mainstream media die woord “anargie” gebruik asof dit inherent ‘n negatiewe konsep is. Kyk na die kakspul om ons, genoeg is genoeg, gee anargie ‘n kans!

Veertien waterlemoenbokke stap in ‘n blougroen landskap van rollende heuwels met ‘n kolossale sandstorm wat strek vir helfte van die horison voor ‘n sonsondergang in die verte wat die hele ruimte bloedroei kleur. Die Tyd Van Die Mense is verby, waterlemoenbok is nou baas. “Koos”, sê die leier. ‘n Majesteuse grys en swart baard wat hang tot op die grond, teken van jare se harde dog regverdige besluite, en littekens sy hele lyf vol. “Hoe laatsit nou?”, vra hy in ‘n sielsdiep, peinsende stem wat babas uit hulle slaap sal pluk en hulle eens normale huilstemme in moordsgille laat ontaard. Koos lig sy kop stadig, sy oë nog toe, amper in afsku. Hy blaas ‘n warm wolk waterlemoenbok asem uit. Oë steeds toe, sê hy vir sy leier: “Tyd om ‘n horlosie te kry!”

Bogenoemde het verskyn in die November 2007 uitgawe van Die Stem, ‘n maandelikse koerant wat gratis versprei word in London.